បុរសម្នាក់ប្រឈមមុខនឹងការជាប់ពន្ធនាគារ ១៤០ឆ្នាំពីបទគំរាមសម្លាប់លោក ដូណាល់ ត្រាំ

អាមេរិក ៖ យោងតាមឯកសាររបស់តុលាការបានឱ្យដឹងថា បុរសម្នាក់ត្រូវបានគេចោទប្រកាន់ បន្ទាប់ពីព្រះរាជអាជ្ញាបាននិយាយថា គាត់បានគំរាមសម្លាប់ប្រធានាធិបតី លោក ដូណាល់ ត្រាំ និងបានបញ្ជូន កញ្ចប់ម្សៅពណ៌ស និងសារព្រមានបំផ្ទុះគ្រាប់បែកទៅកាន់មនុស្សជាច្រើននាក់ផ្សេងទៀត។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃចន្ទ ទី១៣ ខែឧសភា ឆ្នាំ២០១៩នេះ។

លោក Gary Gravelle មានអាយុ៥១ឆ្នាំ ត្រូវបានចោទប្រកាន់ចំនួន១៦ករណី ក្នុងនោះរួមមានទាំងការគំរាម សម្លាប់លោក ដូណាល់ ត្រាំ កាលពីខែកញ្ញា ឆ្នាំ២០១៨ តាមរយៈការផ្ញើកញ្ចប់ម្សៅពណ៌ស និងសារសរសេរដោយ ដៃមួយថា «អ្នកស្លាប់ទៅ»។ មិនតែប៉ុណ្ណោះ បុរសរូបនេះក៏បានផ្ញើ E-mail និងទូរស័ព្ទទៅកាន់មនុស្សជាច្រើននាក់ ដោយគំរាមបំផ្ទុះគ្រាប់បែកនៅក្នុងរដ្ឋ Vermont, ទីក្រុងវ៉ាស៊ីនតោន និងទីតាំងជាច្រើនកន្លែងក្នុងរដ្ឋ Connecticut ផងដែរ។

បើសិនជាលោក Gary Gravelle ត្រូវបានតុលាការអាមេរិកផ្ដន្ទាទោសទាំង១៦បទចោទ នោះលោកអាចនឹងប្រឈមមុខជាប់ពន្ធនាគាររហូតដល់១៤០ឆ្នាំ។ ប៉ុន្តែភ្លាមៗមិនមានការបញ្ជាក់ណាមួយថា លោកមានមេធាវីការពារក្ដីឬក៏យ៉ាងណានោះទេ៕