រកឃើញចាហ៊ួយសង្ស័យដាក់ជាតិប្លាស្ទិកជាង៣៧គីឡូលក់ក្នុងផ្សារប្រសូតិ

ខេត្តស្វាយរៀង ៖ នៅព្រឹកថ្ងៃទី៥ ខែ កញ្ញា ឆ្នាំ ២០១៨នេះ សាខាកាំកុងត្រូលខេត្តស្វាយរៀងបានសហការជាមួយមន្ទីរពាណិជ្ជកម្មខេត្តស្វាយរៀងរួមនិងមន្ត្រីក្រោមឱវាទដឹកនាំដោយ លោក ផឹង និល ប្រធានសាខាកាំកុងត្រូលខេត្តស្វាយរៀង ចុះពិនិត្យទំនិញបន្លែផ្លែឈើនៅទីតាំងផ្សារប្រសូតិ ស្រុក ស្វាយទាបនិង ផ្សារជីភូ ក្រុងបាវិត។

ជាលទ្ធផលបានរកឃើញចាហ៊ួយសង្ស័យថា មានដាក់ជាតិប្លាស្ទិកចំនួន១៥ក្រឡរស្មើនឹង៣៧.៥គីឡូក្រាម និងរកឃើញសាដក៣១កញ្ចប់នៅផ្សារជីភូដែលមានទឹកដោះគោថ្នាំដុះធ្មេញ និងសាប៊ូដែលខូចគុណភាព និងទំនិញខូចគុណភាពជាច្រើនមុខទៀត ដែលដាក់តាំងលក់នៅផ្សារប្រសូត្រស្រុកស្វាយទាប និងផ្សារជីភូ ក្រុងបាវិត ខេត្តស្វាយរៀង ហើយបានដកហូតយកទៅពិសោធន៍ និងដុតកម្ទេចចោល។

បើតាមលោក ផឹង និល បានឱ្យដឹងទៀតថា ដោយមានការណែនាំពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក ម៉ក់ ពេជ្ជរិទ្ធ ប្រតិភូរាជរដ្ឋាភិបាលទទួលបន្ទុកជាអគ្គនាយកកាំកុងត្រូល ក្នុងនោះកាំកុងត្រូលខេត្តស្វាយរៀង តែងតែចុះពិនិត្យមុខទំនិញបានជាច្រើនលើក ហើយការចុះពិនិត្យមុខទំនិញនៅថ្ងៃនេះ ក្នុងគោលបំណងធានាបានសុវត្ថិភាពម្ហូបអាហារ ជូនប្រជាពលរដ្ឋ និងលើកកម្ពស់សុខុមាភាពដល់ពួកគាត់ ព្រោះវាមានសារសំខាន់ណាស់ក្នុងសង្គម និងជីវភាពប្រចាំថ្ងៃ ហើយការទទួលខុសត្រូវលើសុវត្ថិភាពម្ហូបអាហារ គឺជាការទទួលខុសត្រូវរួមគ្នា ទាំងស្ថាប័នជំនាញ ទាំងអ្នកនាំចូល អ្នកផលិត អ្នកចែកចាយ និងអ្នកប្រើប្រាស់ផងដែរ ព្រោះសុខភាព គឺជាកត្តាចំបង នៃភាពរស់រាននៃជីវិត។

លោកបានបញ្ជាក់ទៀតថា មន្ត្រីជំនាញ​បានធ្វើការចុះពិនិត្យមុខទំនិញជាច្រើនមុខ ក្នុងទីតាំងផ្សារប្រសូត្រ និងផ្សារជីភូនាពេលនេះ បានរកឃើញចាហ៊ួយចំនួន១៥ក្រឡស្មើនឹង៣៧.៥ គីឡូ ព្រោះប្រភេទចាហ៊ួយនេះនាំចូលពីប្រទេសជិតខាងវាមានជាតិរឹងស្វិតដែលបង្កឲ្យប៉ះពាល់ដល់ក្រពះពោះវៀនយ៉ាងធ្ងន់ធ្ងរ ខណៈដែលយើងបានបរិភោគវា ជាពិសេសនោះក្មេងៗតូចពិតជាគ្រោះថ្នាក់ខ្លាំងណាស់។

លោកបន្ថែមថា ក្នុងនោះក៏បានរកឃើញទំនិញហួសកាលបរិច្ឆេទមួយចំនួនទៀតផងដែរ មន្ត្រីជំនាញបានធ្វើតេស្តទៅលើមុខទំនិញជាច្រើនមុខមានដូចជាបន្លែ ផ្លែឈើ ផ្អក ប្រហុក ជ្រក់ សណ្តែកបណ្តុះ ឈាមគោ។ល។ ប៉ុន្តែពុំមិនបានរកឃើញផ្ទុកសារធាតុគីមីនោះទេ។

ដោយឡែកនៅផ្សារជីភូវិញសមត្ថកិច្ចបានរកឃើញមានទឹកដោះគោចំនួន៣១កំប៉ុង ថ្នាំដុសធ្មេញ និងសាប៊ូគឺហួសកាលបរិច្ចេទផុតកំណត់ប្រើប្រាស់ត្រូវបានធ្វើការដកហូត។ ចំណែកអ្នកលក់​ក៏បានយល់ព្រមបញ្ឈប់ការដាក់លក់ទំ​និញដែលខូចគុណភាព ហួសការបរិច្ឆេទប្រើប្រាស់ ព្រោះពួកគេទាំងអស់នោះ​បានយល់ដឹង នូវផលប៉ះ​ពាល់ដល់​សុខភាព នៅពេលដែលប្រើប្រាស់ទំ​និញដែលខូចគុណភាព។

ជាមួយគ្នានោះលោក ផឹង និល ក៏បានអំពាវដល់ប្រជាពលរដ្ឋទាំងអស់ នៅខេត្តស្វាយរៀង សូមមានការប្រុងប្រយ័ត្នចំពោះការបរិភោគចំណីអាហារ និងត្រូវពិនិត្យមើល​ស្លាកសញ្ញាកាលបរិច្ឆេទ​ឲ្យបានច្បាស់លាស់ មុន​ទិញយកទៅបរិភោគ ដើម្បីចូលរួមលើកកម្ពស់សុខមាលភាពទាំងអស់គ្នា ហើយមន្ត្រីកាំកុងត្រូល នឹងបន្តចុះ​ពិនិត្យទំនិញនៅតាមផ្សារនានា នៅក្នុងខេត្តស្វាយរៀង ឲ្យបានញឹកញាប់បន្ថែមទៀតជាពិសេសជិតរដូវបុណ្យភ្ជុំបិណ្យខាងមុខនេះ៕ ដោយ ៖ ធារ៉ា