គយចុះពិនិត្យទីតាំងលក់ម៉ាស៊ីនភ្លើងអាជីវករ ចិន២កន្លែងនៅក្រុងព្រះសីហនុ រកឃើញមា៉ស៊ីនជាង៦០គ្រឿង មិនមានឯកសារបង់ពន្ធនាំចូល

ខេត្តព្រះសីហនុ ៖ សមត្ថកិច្ចគយចល័តតំបន់៣ស្រុកស្រែអំបិលនៃអគ្គនាយកដ្ឋានគយ និងរដ្ឋាករកម្ពុជា សហការជាមួយសាខាគយ និងរដ្ឋាករខេត្តព្រះសីហនុចូលរួមពីកម្លាំងកងរាជអាវុធហត្ថលើផ្ទៃប្រទេស កម្លាំងកងរាជអាវុធហត្ថ៤០២ របស់កងរាជអាវុធហត្ថខេត្តព្រះសីហនុ ដោយមានការសម្របសម្រួលពីលោក សុខ កល្យាណ ប្រធានសាលាដំបូងខេត្តព្រះសីហនុ និងលោកព្រះរាជអាជ្ញា សៀង សុខ ហើយនិងលោកព្រះរាជអាជ្ញារង លឹម ប៊ុនហេង ដឹកនាំចុះអនុវត្តន៍ផ្ទាល់ អនុវត្តន៍តាមដីកាលេខ២៨០៥ ចុះថ្ងៃទី១១ ខែកក្កដា ឆ្នាំ២០១៩ របស់សាលាដំបូងខេត្តព្រះសីហនុ បានចូលឆែកត្រួតពិនិត្យក្នុងឃ្លាំងលក់ម៉ាស៊ីនភ្លើងចំនួន០២កន្លែង នៅព្រឹកថ្ងៃទី១១ ខែកក្កដា ឆ្នាំ២០១៩ដែលមានម្ចាស់ជាជនជាតិចិន ដែលមានទីតាំងទី១.ឃ្លាំងស្តុកម៉ាស៊ីនភ្លើងមានឈ្មោះ ហាង ហ្វូលីស៊ឺថឹ មានទីតាំងនៅ ឃ្លាំងគ្មានលេខ ផ្លូវជាតិលេខ៤ ភូមិ០១ សង្កាត់០១ ក្រុង.ខេត្តព្រះសីហនុ ទល់មុខរោងចក្រស្រាបៀរក្រោន និងទី២.ឃ្លាំងស្តុកម៉ាស៊ីនភ្លើង (គ្មានឈ្មោះ) មានទីតាំងនៅ ឃ្លាំងគ្មានលេខ ផ្លូវជាតិលេខ៤ ភូមិ០១ សង្កាត់០១ ក្រុង.ខេត្តព្រះសីហនុ ទល់មុខរោងចក្រស្រាបៀរក្រោន ឆៀងខាងលិច។

បើតាមមន្ត្រីគយថ្លែងថា ក្នុងពេលឆែកត្រួតពិនិត្យកន្លែងលក់ម៉ាស៊ីនភ្លើងទាំង២កន្លែងនេះ សមត្ថកិច្ចរកឃើញមានម៉ាស៊ីនភ្លើងថ្មីទាំងតូចទាំងធំប្រមាណជាង៦០គ្រឿង ដែលមិនទាន់មានឯកសារបង់ពន្ធនាំចូលខុសនឹងនីតិវិធីគយ។ ករណីនេះសមត្ថកិច្ចគយបានដកហូតយកម៉ាស៊ីនភ្លើងទាំងអស់ទៅរក្សាទុកជាបណ្តោះអាសន្ន រួចហើយតម្រូវឲ្យម្ចាស់ចូលទៅបង្ហាញឯកសារបង់ពន្ធ និងបើគ្មានឯកសារត្រឹមត្រូវ តម្រូវឲ្យម្ចាស់បង់ពន្ធជូនរដ្ឋ ជាមួយនឹងការផាកពិនយ័តាមនីតិវិធីច្បាប់។

មន្ត្រីគយដដែលបញ្ជាក់ដែរថា សកម្មភាពបង្ក្រាបទំនិញគេចពន្ធនេះ គឺអនុវត្តន៍តាមគោលការណ៍ណែនាំផ្ទាល់ពីប្រធាននាយកដ្ឋានបង្ការ និងបង្ក្រាបអំពើគេចពន្ធ និងលោកប្រតិភូរាជរដ្ឋាភិបាលទទួលបន្ទុកអគ្គនាយកគយ និងរដ្ឋាករកម្ពុជា ដែលតម្រង់ទិសឲ្យប្រតិបត្តិករឯកជនទាំងអស់ ទាំងជនជាតិខ្មែរ និងជនបរទេសត្រូវគោរពច្បាប់ពន្ធគយ ដើម្បីប្រមូលប្រាក់ពន្ធជូនរដ្ឋ។

គួរបញ្ជាក់ផងដែរថា សមត្ថកិច្ចគយចល័តតំបន់៣ស្រុកស្រែអំបិលនៃអគ្គនាយកដ្ឋានគយ និងរដ្ឋាករកម្ពុជា សហការជាមួយសាខាគយ និងរដ្ឋាករខេត្តព្រះសីហនុបានចាប់រថយន្តទំនើបជាច្រើនគ្រឿងនៅទឹកដីខេត្តព្រះសីហនុដូចភ្លៀងរលឹម៕