សម្តេចតេជោ ហ៊ុន សែន បញ្ជាក់ថា សុខភាព​របស់​សម្តេច​គឺ​រឹងមាំ​ធម្មតា​ទេ​

​ ​ភ្នំពេញ ៖ សម្តេច ហ៊ុន សែន នាយករដ្ឋមន្ត្រី​កម្ពុជា​បាន​ថ្លែង​បញ្ជាក់ថា សុខភាព​របស់ សម្តេច​គឺ​រឹងមាំ​ធម្មតា​ទេ​…. សម្តេច​បន្តថា ថ្ងៃស្អែក​សម្តេច​នឹង​ជួប​ភ្ញៀវ​មកពី​មូលនិធិ​អន្តរជាតិ សម្រាប់​អភិវឌ្ឍន៍​កសិកម្ម​នៅ​ទីស្តីការ។​ នេះ​បើ​យោង​សំណេរ​នៅលើ Facebook ផ្លូវការ​របស់​សម្តេច​ដែល​បង្ហោះ​នៅ​ថ្ងៃទី​២៥ ខែកក្កដា ឆ្នាំ​២០១៩​នេះ ។​

​សម្តេច ហ៊ុន សែន បាន​សរសេរ​យ៉ាង​ដូច្នេះ​ថា សុខ​សប្បាយ​ជា​ទេ បងប្អូន​ជនរួមជាតិ​?

​សុខភាព​ខ្ញុំ គឺ​រឹងមាំ​ធម្មតា​ទេ​។ ស្អែក​នេះ ខ្ញុំ​ជួប​ភ្ញៀវ​មកពី​មូលនិធិ​អន្តជាតិ​សម្រាប់​អភិវឌ្ឍន៍ កសិកម្ម​នៅ​ទីស្តីការ​។​

​អរគុណ​បងប្អូន​ដែល​បាន​ជូនពរ​ខ្ញុំ​។ អ្វីដែល​សំខាន់បំផុត​ចំពោះ​ខ្ញុំ គឺ​បងប្អូន​ជនរួមជាតិ​មាន ការងារ​មុខរបរ​រស់នៅ​សុខ​សប្បាយ និង​កូនចៅ​មានឱកាស​ទៅ​សាលារៀន​នៅ​គ្រប់​ទីកន្លែង​។​

​ខ្ញុំ​សូម​ជូនពរ និង​អរគុណ​បងប្អូន​ដែល​បាន​ចូលរួម​ថែរក្សា​សន្តិភាព និង​ចូលរួម​អភិវឌ្ឍ​ប្រទេស ជាតិ​យើង​អោយ​កាន់តែ​រីកចម្រើន​ទៅមុខ​។​

​តាម​សំណេរ​បញ្ជាក់​របស់​សម្តេច​ជាការ​ឆ្លើយតប​ទៅ​ក្រុមប្រឆាំង​នៅ​កម្ពុជា​ដែល​បាន​ផ្សព្វផ្សាយ​ព័​ត៌ មាន​មិន​ពិត​ថា ការលើក​ពេល​ប្រជុំ​គណរដ្ឋមន្ត្រី​ស្អែក​នេះ ដោយសារ​សុខភាព​រប​ស់ស​ម្តេច ហ៊ុន សែន ដែល​បំភ្លៃ​ខុស​ការពិត ។​

​ចំណែក​លោក ផៃ ស៊ី​ផាន អ្នកនាំពាក្យ​រាជរដ្ឋាភិបាល​កម្ពុជា បាន​ច្រានចោល​ផងដែរ នូវ​ការ​បំភ្លៃ​ព័ត៌មាន របស់​ក្រុមប្រឆាំង​ជ្រុលនិយម​មួយចំនួន ពាក់ព័ន្ធ​នឹង​ការលើក​ពេល​ប្រជុំ​គណៈ​គណៈរដ្ឋមន្ត្រី នៅ​ថ្ងៃ​សុក្រ សប្តាហ៍​នេះ​។​
​ថ្លែង​ក្នុង​សន្និសីទ​សារព័ត៌មាន នៅ​ព្រឹក​ថ្ងៃទី​២៥ ខែកក្កដា ឆ្នាំ​២០១៩​នេះ លោក ផៃ ស៊ី​ផាន បាន​អះអាងថា ការលើក​ពេល​ប្រជុំ​គណរដ្ឋមន្ត្រី​នេះ​ជា​រឿង​ធម្មតា​មួយ ប៉ុន្តែ​មិនមាន​ពាក់ព័ន្ធ​ជាមួយ​សុខភាព​របស់ សម្តេចនាយក​រដ្ឋមន្ត្រី​នោះឡើយ​៕