ទេសរដ្ឋមន្រ្តី អូស្មាន ហាស្សាន់ បន្តផ្តល់គោគួរបានបន្ថែម៣០០ក្បាលទៀតក្នុងពិធីបុណ្យរ៉យ៉ាហាជ្ជី

ខេត្តកំពង់ធំ ៖​ ឧកញ៉ាបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធាន​ អង្គការមូលនិធិអភិវឌ្ឍន៍ មូស្លិមកម្ពុជា កាលពីព្រឹកថ្ងៃទី១២ ខែសីហា ឆ្នាំ២០១៩ម្សិលមិញបានអញ្ជើញ សំណេះសំណាល និង ប្រគល់គោគួរបានចំនួន ១០០ក្បាលជូនដល់បងប្អូនប្រជាសហគមន៍ខ្មែរឥស្លាម៩រាជធានី-ខេត្ត។

ពិធីនេះធ្វើឡើងនៅភូមិត្រពាំងឈូក ឃុំបឹង ស្រុកបារាយណ៍ខេត្តកំពង់ធំ ក្រោមជំនួយឧបត្ថម្ភរបស់អង្គការ Turkiye Diyanet Foundation (TDV) ប្រទេសតួកគី សហការណ៍ជាមួយអង្គការមូលនិធិ អភិវឌ្ឍន៍មុស្លិមកម្ពុជា(CMDF)។

នៅរដូវបុណ្យហាជ្ជឆ្នាំ ២០១៩ នេះ អង្គការ Turkiye Diyanet Foundation (TDV) ប្រទេសតួកគី សហការណ៍ជាមួយអង្គការមូលនិធិ អភិវឌ្ឍន៍មុស្លិមកម្ពុជា(CMDF) បានប្រគល់គោគួរបានដល់សហគមន៍ខ្មែរឥស្លាមទូទាំងប្រទេសចំនួន ៣០០ ក្បាល។​

ប្រជាសហគមន៍ខ្មែរឥស្លាមដែលទទួលបានគោគួរបានចំនួន​១០០​ក្បាលរួមមាន ៖ ខេត្ដកំពង់ធំ៥១ ក្បាល ខេត្តកំពង់ចាម០៨ក្បាល ខេត្តកំពង់ឆ្នាំង០៩ក្បាល ខេត្តត្បូងឃ្មុំ០៧ក្បាល ខេត្តកណ្ដាល០៣ ក្បាល ខេត្តសៀមរាប០៣ក្បាល ខេត្តព្រះវិហារ០២ក្បាល ខេត្តក្រចេះ០១ក្បាល និង​រាជធានីភ្នំពេញចំនួន១៦ក្បាល។​

ក្នុងពិធីសំណេះសំណាល លោកទេសរដ្ឋមន្ត្រីបានថ្លែងអំណរគុណដល់អង្គការ Turkiye Diyanet Foundation (TDV) ប្រទេសទួរគី ដែលបានធ្វើដំណើររាប់ពាន់គីឡូម៉ែត្រ ដើម្បីនាំយកអំណោយផ្សេងៗជូនដល់ប្រជាសហគមន៍ឥស្លាមនៃប្រទេសកម្ពុជា។ សកម្មភាពទាំងនេះបញ្ជាក់ឲ្យឃើញយ៉ាងច្បាស់​ អំពីតម្លៃនៃការចែករំលែក ក្នុងនាមភាតរភាពឥស្លាម ក៏ដូចជាក្នុងនាមមនុស្សជាតិទូទាំងពិភពលោក។

នៅក្នុងឱកាសនោះផងដែរ លោកទេសរដ្ឋមន្រ្តីក៏បានផ្ដាំផ្ញើដល់យុវជនជំនាន់ក្រោយដែលត្រូវបន្តវេន សូមបន្តរក្សាសាមគ្គីភាព ភាតរភាព និងចូលរួមផ្សាភ្ជាប់ទំនាក់ទំនង​ រវាងយុវជន​ និង​ យុវជន ដើម្បីបន្តកសាងសហគមន៍ក៏ដូចជាប្រទេសជាតិទាំងមូល ជាពិសេសដើម្បីរក្សាការពារសុខសន្តិភាពដែលមានស្រាប់ឲ្យបានឋិតថេរចីរកាល៕