កម្មករនិយោជិត ក្នុង​វិស័យ​កាត់ដេរ និង​វិស័យ​ទេសចរណ៍ជាង២ម៉ឺននាក់ទទួលប្រាក់​ឧបត្ថម្ភ​ជាថ្មីទៀតពីក្រសួង​ការងារ

ភ្នំពេញ​ ៖ ក្រសួង​ការងារ និង​បណ្តុះបណ្តាល​វិជ្ជាជីវៈ បានប្រកាស នៅ​ថ្ងៃទី​២៩ ខែកក្កដា ឆ្នាំ​២០២០ នេះ ​ពី​ការបើកប្រាក់​ឧបត្ថម្ភ ជូន​កម្មករនិយោជិត សរុប​ចំនួន ២៧. ៩៣៧ នាក់ នៅ​រោងចក្រ សហគ្រាស​ចំនួន ៨៥ ក្នុង​វិស័យ​កាត់ដេរ និង​វិស័យ​ទេសចរណ៍ ដែល​ត្រូវបាន​ព្យួរ​កិច្ចសន្យាការងារ ស្របតាម​ស្មារតី​នៃ​កញ្ចប់​វិធានការ​របស់​រាជរដ្ឋាភិបាល​កម្ពុជា។ កម្មករនិយោជិត ទាំង ២៧.៩៣៧ នាក់​នេះ ទទួលបាន​ប្រាក់ឧបត្ថម្ភ លើក​ទី​១ រួចមកហើយ​។​

ក្នុងចំណោម រោងចក្រ​សហគ្រាស ទាំង ៨៥ ដែល​ព្យួរការងារ​នេះ គឺ​វិស័យ​កាត់ដេរ មាន​ចំនួន ៥៤​រោងចក្រ នៅ​ភ្នំពេញ ខេត្តកណ្តាល កំពង់ស្ពឺ តាកែវ ស្វាយរៀង ព្រះសីហនុ ត្បូងឃ្មុំ ពោធិ៍សាត់ កំពត សៀមរាប និង​ខេត្តបន្ទាយមានជ័យ​។ រីឯ​វិស័យ​ទេសចរណ៍ មាន ៣១​ក្រុមហ៊ុន ដែលជា​ក្រុមហ៊ុន​ទេសចរណ៍ សណ្ឋាគារ និង​ភោជនីយដ្ឋាន នៅ​ភ្នំពេញ សៀមរាប និង​ខេត្តកំពត​។​

សូមជម្រាបថា​ ​ការបើកប្រាក់​ឧបត្ថម្ភ​នេះ ធ្វើឡើង​តាម​ធនាគារ​ឯកទេសវី​ង(Wing) ដែល​នឹង​ផ្ញើ​សារ​អំពី​ការបើកប្រាក់​នេះ ទៅកាន់​ទូរស័ព្ទ​របស់​កម្មករ​និយោជិត ក្នុង​រោងចក្រ​សហគ្រាស ក្រុមហ៊ុន សណ្ឋាគារ ភោជនីយដ្ឋាន ដែល​បាន​ព្យួរការងារ​។​

​ក្រសួង​ការងារ បាន​រម្លឹកថា ធនាគារ​ឯកទេស​វី​ង នឹង​បង្វិល​ប្រាក់ឧបត្ថម្ភ​នេះ ជូន​រាជរដ្ឋាភិបាល​វិញ ប្រសិនជា​បងប្អូន​ខក​ខាន មិនបាន​ទៅ​បើកប្រាក់​ឧបត្ថម្ភ​នេះ ក្នុង​រយៈពេល ១០​ថ្ងៃ បន្ទាប់ពី​ទទួលបាន​សារ​តាម​ទូរស័ព្ទ​ពី​ធនាគារ​ឯកទេស​វី​ង​។ ដើម្បី​បើកប្រាក់​ឧបត្ថម្ភ​នេះ បងប្អូន​ត្រូវយក​អត្តសញ្ញាណប័ណ្ណ​សញ្ជាតិ​ខ្មែរ និង​ទូរស័ព្ទ ដែល​ទទួលបាន​សារ​នោះ ទៅកាន់​ភ្នាក់ងារ វី​ង ដែល​នៅ​ជិត​បំផុត​។

​ក្រសួង​ការងារ បាន​គូសបញ្ជាក់ថា បងប្អូន​កម្មករនិយោជិត មិន​តម្រូវ​ឲ្យ​បង់ថ្លៃ​សេវា​ទៅ​ភ្នាក់ងារ​វី​ង​ឡើយ ពេល​បើកប្រាក់​ឧបត្ថម្ភ​នេះ​៕