ស្ត្រី​ខ្មែរ​សញ្ជាតិ​អាមេរិដែល​លួច​រត់​ចេញពី​កន្លែង​ធ្វើ​ច​ត្តា​ឡី​ស័ក មិនមានជំ​ងឹ​កូ​វីដ​១៩​ទេ​

​ភ្នំពេញ ៖ ស្ត្រី​ខ្មែរ​សញ្ជាតិ​អាមេរិកាំង​ម្នាក់ ឈ្មោះ រ៉ូ​ស វី​រ៉ា ដែល​លួច​រត់​ចេញពី​កន្លែង​ធ្វើ​ច​ត្តា​ឡី​ស័ក​នៅ​រាជធានី​ភ្នំពេញ​កាលពីពេល​ថ្មីៗ​នេះ ហើយ​បង្ក​ការភ្ញាក់ផ្អើល​និង​រិះគន់​យ៉ាងខ្លាំង​នោះ ឥឡូវនេះ​ត្រូវបាន​មន្ត្រី​ជំនាញ​សុខាភិបាល​អះអាងថា ស្ត្រី​រូបនោះ​មិនមាន​ជំងឺ​កូ​វីដ​១៩​នោះទេ បន្ទាប់ពី​ចាប់​ដាក់​ឱ្យធ្វើ​ច​ត្តា​ឡី​ស័ក និង​តាមដាន​សុខភាព​ជាថ្មី​អស់​រយៈពេល ១៤​ថ្ងៃ​នៅក្នុង​ខេត្តកំពង់ចាម​។

​តាម​សារព័ត៌មាន​ក្នុងស្រុក​ដែល​បាន​ដកស្រង់​សំដី​របស់ឯកឧត្តម អ៊ុន ចាន់​ដា អភិបាលខេត្ត​កំពង់ចាម មក​ចុះផ្សាយ​នៅថ្ងៃនេះ​ដោយ​លោក​បញ្ជាក់ថា បន្ទាប់ពី​ដាក់ឱ្យ​ធ្វើ​ច​ត្តា​ឡី​ស័ក និង​តាមដាន​សុខភាព​ជាថ្មី​រយៈពេល​១៤​ថ្ងៃ ហើយ​ពិនិត្យ​សុខភាព​ជាថ្មី​ចំនួន​ពីរដង​រួចមក ស្ត្រី​រូបនេះ​មិនមាន​រោគសញ្ញា​ជំងឺ​កូ​វីដ​១៩​នោះទេ​។ ឯកឧត្តម​អភិបាលខេត្ត បាន​បន្ថែមថា ស្ត្រី​រូបនេះ​នឹងត្រូវ​អនុញ្ញាតឱ្យ​ចេញពី​មណ្ឌល​ច​ត្តា​ឡី​ស័ក​នៅថ្ងៃនេះ​ផងដែរ៕