ពលរដ្ឋ​ខ្មែរ​ចំនួន​៧៩​នាក់​មកពី​ប្រទេស​ហ្ស៊​កដា​នី ឥណ្ឌា និង​ប៉ា​គី​ស្ថាន នឹង​មកដល់​កម្ពុជា​វិញ​នៅ​ព្រឹក​នេះ​

​ភ្នំពេញ ៖ អ្នកនាំពាក្យ​ក្រសួងការបរទេស និង​សហប្រតិបត្តិការ​អន្តរជាតិ​លោក គុយ គួ​ង បាន​ថ្លែងប្រាប់​បណ្តាញសារព័ត៌មាន​ក្នុងស្រុក​ថា មាន​ប្រជាពលរដ្ឋ​ខ្មែរ​ចំនួន​៧៩​នាក់ នឹង​ត្រឡប់​មកពី​ប្រទេស​ហ្ស៊​កដា​នី​, ឥណ្ឌា និង​ប៉ា​គី​ស្ថាន ចូល​មកដល់​កម្ពុជា​វិញ​នៅ​ព្រឹក​នេះ តាម​ជើងហោះហើរ​ចំនួន​២​ផ្សេងគ្នា​។​

​តាម​លោក កុយ គួ​ង បាន​បញ្ជាក់ថា ដោយមាន​កិច្ចខិតខំ​ប្រឹងប្រែង និង​សម្របសម្រួល​របស់​ស្ថានទូត​កម្ពុជា​ប្រចាំ​ប្រទេស​អេ​ហ្ស៊ី​ប ពលករ​ខ្មែរ​ចំនួន​២៨​នាក់ និង​ទារក​១​នាក់ ដែល​ត្រូវបាន​រោងចក្រ​វាយ​ន​ភណ្ឌ​ចំនួន​០២ (Vega Textile Co., Ltd. និង Camel Textile International Corporation) នៅ​ប្រទេស​ហ្ស៊​កដា​នី បញ្ឈប់​កិច្ចសន្យាការងារ ដែល​ពួកគាត់​នឹងធ្វើ​ដំណើរ​ចេញពី​ប្រទេស​ហ្ស៊​កដា​នី នៅ​ថ្ងៃទី​៣០ ខែកក្កដា ឆ្នាំ​២០២០ ដោយ​ឆ្លងកាត់​ប្រទេស​មី​យ៉ាន់​ម៉ា ហើយនឹង​មកដល់​ប្រទេស​កម្ពុជា​នៅ​ថ្ងៃទី​៣១ ខែកក្កដា ឆ្នាំ​២០២០ វេលា​ម៉ោង​០៨៖១៥​ព្រឹក តាម​ជើងយន្តហោះ​លេខ 8M1105​។ ពលករ​ខ្មែរ​ចំនួន​២៨​នាក់​នេះ គឺ​ស្ថិត​ក្នុងចំណោម​ពលករ​ខ្មែរ​សរុប​ចំនួន​៨៣ ដែល​កំពុងធ្វើការ​ងារ​នៅក្នុង​រោងចក្រ​ទាំងពីរ​ខាងលើ​។​

​ដោយឡែក​នៅ​ព្រឹក​ថ្ងៃ​នេះដែរ​ក៏មាន​ពលរដ្ឋ​កម្ពុជា​ចំនួន​៥០​នាក់ (​ជា​អ្នកដំណើរ​ទូទៅ​អ្នក​មកពី​ពិនិត្យ​ជំងឺ និង​និស្សិត​) មកពី​ប្រទេស​ឥណ្ឌា និង​ប្រទេស​ប៉ា​គី​ស្ថាន ក៏​នឹងធ្វើ​ដំណើរ​ត្រឡប់មក​កម្ពុជា ឆ្លងកាត់​ប្រទេស​ម៉ាឡេស៊ី តាម​ជើងយន្តហោះ​ពាណិជ្ជកម្ម​របស់​ក្រុមហ៊ុន​អាកាសចរណ៍ ម៉ាឡេស៊ី លេខ MH754 ដែល​នឹង​ចេញដំណើរ ពី​ទីក្រុង​គូ​ឡា​ឡាំ​ពួ នៅវេលា​ម៉ោង​៩៖០០​នាទី​ព្រឹក ថ្ងៃទី​៣១ ខែកក្កដា ឆ្នាំ​២០២០ ហើយនឹង​ទៅដល់​ទីក្រុង​ភ្នំពេញ នៅវេលា​ម៉ោង​១០៖០០​នាទី​ព្រឹក​ថ្ងៃទី​៣១ ខែកក្កដា ឆ្នាំ​២០២០​នេះ​ផងដែរ៕ ( អត្ថបទ​ដកស្រង់​ខ្លឹមសារ​ពី FN )