លោក Suga ជាប់ឆ្នោតជាអ្នកដឹកនាំថ្មី របស់បក្សកាន់អំណាចជប៉ុន ដែលនឹងត្រួសត្រាយផ្លូវទៅរកតំណែងនាយករដ្ឋមន្ត្រី

តូក្យូ ៖ លេខាធិការខុទ្ទកាល័យរបស់ប្រទេសជប៉ុន លោក ស៊ូហ្គា យ៉ូស៊ីហ៊ីដិ (Suga Yoshihide) និងជាដៃស្តាំរបស់អតីតនាយករដ្ឋមន្ត្រីជប៉ុនលោក Abe បានជាប់ឆ្នោតជាមេដឹកនាំថ្មី របស់គណបក្សប្រជាធិបតេយ្យសេរីដែលកំពុងកាន់អំណាច ខណៈលោកត្រូវបានគេរំពឹងថា នឹងក្លាយជានាយករដ្ឋមន្ត្រីថ្មី ព្រោះគណបក្សបក្សមានសំឡេងភាគច្រើននៅក្នុងសភាជប៉ុន។ នេះបើតាមសារព័ត៌មាន Sputnik។

យោងតាមលទ្ធផលនៃការបោះឆ្នោត នៅក្នុងគណបក្ស LDP លោក Suga Yoshihide ទទួលបានសំឡេងគាំទ្ររហូតដល់ទៅ ៣៧៧សំឡេងឯណោះ ខណៈអតីតរដ្ឋមន្ត្រីការពារជាតិជប៉ុនលោក ស៊ីហ្គែរុ អ៉ីស៊ីបា (Shigeru Ishiba) ទទួលបាន ៦៨សំឡេង និងអតីតរដ្ឋមន្ត្រីការបរទេសជប៉ុនលោក ហ្វូមីអ៊ូ គីហ្ស៊ីដា (Fumio Kishida) ទទួលបាន ៨៩សំឡេង។

ការជាប់ឆ្នោតធ្វើជាប្រធានថ្មី នៃគណបក្សកាន់អំណាចពេលនេះ នឹងធ្វើឲ្យលោក Suga Yoshihide គិតគូរអំពីជំហានបន្ទាប់ ដើម្បីក្លាយខ្លួនជានាយករដ្ឋមន្ត្រីជប៉ុនថ្មី ក្រោយពីលោក អាបេ ស៊ីនហ្សូ កាលពីខែសីហាកន្លងទៅនេះបានប្រកាសថា លោកនឹងលាលែងចេញពីតំណែង ដោយសារតែបញ្ហាសុខភាពជាចម្បង៕