អនុរដ្ឋមន្រ្តីការបរទេសកូរ៉េខាងជើង បំពេញទស្សនកិច្ចកម្រមួយ ទៅកាន់ប្រទេសម៉ុងហ្គោលី

ប្រភព៖ AFP

អ៊ូឡង់បាទ័រ៖ ទីភ្នាក់ងារព័ត៌មានរដ្ឋកូរ៉េខាងជើង KCNA បានរាយការណ៍ថាអនុរដ្ឋមន្រ្តីការបរទេសកូរ៉េខាងជើង លោក Pak Myong Ho បានបើកកិច្ចពិភាក្សានៅប្រទេសម៉ុងហ្គោលីក្នុងសប្តាហ៍នេះ ជាមួយសមភាគី​របស់លោក ក្នុងដំណើរបំពេញទស្សនកិច្ចកម្រមួយចេញក្រៅប្រទេស ដោយប្រតិភូការទូតរបស់ទីក្រុងព្យុងយ៉ាង។

ម៉ុងហ្គោលីជាប្រទេសស្ថិតនៅចន្លោះ សម្ព័ន្ធមិត្តដ៏សំខាន់ទាំងពីររបស់ទីក្រុងព្យុងយ៉ាង គឺរុស្ស៉ីនិងចិន ហើយពឹងផ្អែកលើចិនសម្រាប់ការនាំចូល​ថាមពល និងទៅលើរុស្ស៉ី សម្រាប់ការនាំចេញវត្ថុធាតុដើម ជាចម្បងគឺធ្យូងថ្ម។ យ៉ាងណាមិញ ម៉ុងហ្គោលីបានព្យាយាមប្រកាន់ជំហរអព្យាក្រឹត ជាមួយគោលនយោបាយការបរទេសរបស់ខ្លួន ដោយស្វែងរកតុល្យភាពក្នុងចំណងទាក់ទងជាមួយប្រទេសធំៗ រួមមានទាំងសហរដ្ឋអាមេរិក ជប៉ុន កូរ៉េខាងត្បូង ហើយទន្ទឹមគ្នានៅរក្សាទំនាក់ទំនងជាមួយកូរ៉េខាងជើង។

KCNA បានរាយការណ៍នៅថ្ងៃអង្គារនេះថា លោក Pak បានជួបសម្តែងការគួរសមជាមួយ ប្រមុខការទូត​របស់ម៉ុងហ្គោលី លោកស្រី Battsetseg Batmunkh កាលពីថ្ងៃអាទិត្យចុងសប្តាហ៍កន្លងទៅ មុនបើកកិច្ចពិភាក្សាទ្វេភាគីជាមួយ អនុរដ្ឋមន្រ្តីការបរទេសម៉ុងហ្គោលី លោក Amartuvshin Gombosuren កាលពីថ្ងៃចន្ទសប្តាហ៍នេះ៕